قصص النجاح: الفنانة والمدربة نهى المُرّ تحصل على ترقية "المدرب الأول" فى تعليم الفنون بمؤسسة ارت هاوس

النهاردة بنحتفل في ارت هاوس بترقية المدربة والفنانة نهي المر لمنصب "المدرب الأول" مع كل الامتيازات الوظيفية الخاصة بالترقية دي، وتكريمها بدرع ترقية المدربين تقديرًا لجهودها ودورها الكبير في المؤسسة . رحلة نهى مع ارت هاوس بدات سنة 2018 كمتدربة ، وانضمت لفريق العمل سنة 2021 كمدربة ، وخلال سبع سنين من الشغف والتطور وصلت لمكانها الحالي كمدربة محترفة وحصلت خلال مسيرتها على شهادات متنوعة ومن وقتها وهي جزء اساسي في نجاحات المؤسسة وساهمت في تحقيق انجازات نفتخر بيها. احنا في ارت هاوس مؤمنين أن نجاح المدربين عندنا بيظهر من خلال دورهم في تطوير المستوى الفني للمتدربين وتقديم الدعم الفني لهم، وعلشان كده بنعتمد على نظام تقييم أداء دقيق للمدربين لضمان الجودة والاستمرارية. ومن هنا بتيجي أهمية الترقيات، لأنها مش مجرد خطوة وظيفية، لكنها اعتراف حقيقي بجهود المدرب وتأثيره داخل المؤسسة. الحصول على الترقيات مش سهل وبيشترط وجود عدد سنين خبرة وتقييم أداء عالي، مش بس من ناحية إفادة المتدربين والالتزام والسعي في تزويد المهارات الفنية، لكن كمان من ناحية الشخصية، والعلاقات داخل الفريق، والمساهمة في خلق بيئة إيجابية وسليمة. احنا مش مجرد مكان بيعلم الرسم، احنا كيان ومجتمع فني مترابط بيدعم الفنانين وبنساعدهم علي التطور. وتحقيق الهدف ده و المساهمة فيه شئ مش سهل، وده شئ بيميز نهى انها مش بس مدربة موهوبة لكنها كمان جزء من روح المكان، وبتساهم في التطور التدريجي اللي بنبنيه في ارت هاوس بصبر وشغف. احنا مؤسسة بتكبر بخطوات ثابتة ومدروسة، ونجاحنا بشكل كبير بيعتمد على ان كل فرد في الفريق بيشارك في صناعة الفرق. وده بيخلي نهى عنصر اساسي في نجاح الفريق حتى في الاوقات اللي بتحتاج تحديات وصبر . فى ارت هاوس دايمًا في حالة تطوير مستمر، ومش بنثبت على برنامج تدريبي ودايما بنطور فيه للافضل، وده جزء من هويتنا كمؤسسة ابداعية. والتغيير المستمر ده ممكن يكون تحدي للبعض، لكن نهى كانت دايمًا جزء من رحلة التطوير دي وبتساهم فيها. بتحب التحديات وانها تقدم محتوى تدريبي جديد ومختلف، وده ظهر بشكل واضح في شغلها ومشاريع المتدربين معاها. وكانت أول مدربة في الفريق تقدم كورسات رسم مناظر طبيعية بالألوان الزيتية، وأشرفت على خروج المتدربين بمشاريع فنية قوية ومميزة، وده اضافة حقيقية لتجربة التعليم عندنا. كمان نهي بتتميز بروحها الحلوة وقدرتها على نشر طاقة إيجابية بين المتدربين، وده بيخلق جو محفّز ومريح في الورش التعليمية. وجود انشطة ترفيهية و مدرب ينقل الحماس للمتدربين بيفرق جدا في تجربتهم ويخليهم يتعلموا بثقة ومتعة. وكان لنهي كمان مجهود ودور اساسي في نجاح الفعاليات الرمضانية لسنة 2024، واللي حققت نجاح كبير جدًا لينا كمؤسسة وفريق ومشاركين. الفعاليات دي مش مجرد نشاطات فنية وترفيهية ، لكنها مسئولية كبيرة علينا كفريق عمل علشان نقدر نوفر مساحة لدعم الفنانين وتحفيزهم على تطوير نفسهم والمشاركة في اعمال جماعية ملهمة. مبروك لنهي على الترقية المستحقة ، ونتمنى ليها مزيد من النجاح والتالق. متاكدين انها هتفضل تقدم الأفضل وتشارك فى رسالتنا كمؤسسة فى دعم اي حد عنده حلم يتعلم الرسم، وتساعد الفنانين يطوروا موهبتهم ويحققوا احلامهم الفنية .

قصص النجاح